Kiepersol Plaas produkte gee waarde vir jou geld

img_8789

Boerdery was nog altyd net ‘n stokperdjie gewees vir Juan en Roxanne van der Walt. Hulle het  ‘n selfoon winkel in Brits besit, maar as gevolg van hoofkantoor wat besluit het om toe te maak moes hulle ‘n plan maak om hulle inkomste op ‘n ander manier te kry. Dit is toe hulle besluit het om voltyds in hulle boerdery in te gaan. Toe begin hulle met die hoenderboerdery. Maar hulle wou nie net nóg ‘n hoenderboerdery wees nie.

Wat vir Kiepersol Farms anders maak is die hoenderrolle wat hulle op die plaas self maak, verpak en verkoop. Hulle ontbeen die hoenders self sonder om die vel af te haal en dan kry die ontbeende hoender ‘n vulsel. Daar is vyf verskillende vulsels wat gebruik word vir die hoenderrolle. Spek en Kaas, ham sampioen en kaas, ham pynappel en kaas, room spinasie en kaas, ham en sampioen. Die ham en sampioen is spesiaal vir diegene wat ‘n melk allergie het.

img_8793 img_8781

“Ons wil nie net ‘n hoender ‘smous’ wees nie. Ons wil iets anders doen wat vir die publiek waarde vir hulle geld gee.” Vertel Juan, “Ons hoenders is ook organies. Hulle loop vir so 40 – 42 dae, want ons soek groot hoenders. Daar word geen hormone in die hoenders ingespuit nie. Die vleis wat jy by ons koop is regte plaas hoenders.” Tog is hoenders nie al waarmee hierdie span boer nie. Hulle het ook boerbokke wat hulle mee teel omdat hulle in die toekoms wil registreer as ‘n stoe-tery. Hulle spog ram, Chocolate, loop breëbors tussen die ooie rond. Daar is ook ‘n paar skape wat vir slagdoeleindes geteël word. Net ‘n entjie van hulle huis af is ‘n kampie waar hulle met ‘n “Swart Rooibok Projek” aan die gang is. Daar is op die oomblik ± 50 rooibokke in die kamp, met ‘n mengsel van gewone rooibokke en splits.

“Ons is baie vleisgedrewe, en wou die boerdery met iets anders diversifiseer. In September maand het ons begin met ‘n turksvy plantasie. Drie kleure word aangeplant, die gewone wit, dan ‘n geel en rooi vrug. Dit is ‘n plant wat nie baie water nodig het nie aangesien hier op die plaas nie so baie water is nie.”  Vertel Juan verder. Op Kiepersol Plaas word alles self gebou en gedoen. Die hoenderhokke was self gebou met ou materiaal wat op die plaas lê. Dan is die voermenger uit ‘n ou dieseltank gebou.  “Wat ons boerdery anders maak is dat ons die hele familie inspan om te help. Hulle sê mos vele hande ligte werk. Ek en Juan het hierdie boerdery saam van die grond af gebou en dit lê ons baie na aan die hart.” Sê Roxanne.

Hulle gee betekenis aan die gesegde ‘‘n Boer maak ‘n plan”.