Oktober in die permakultuur tuin

tamera_www-permies-com-t-14412-permaculture-tamera-water-retention-landscape2

In permakultuur probeer ons om die natuur na te boots om sodoende die beste oes te verkry op ‘n volhoubare manier. Daarom maak ons eerder gebruik van groepe plante as om ‘n klomp van een soort aan te plant. Hierdie groepe plante noem ons gilde of ‘guilds’ in engels. ‘n Gilde is ‘n groep plante wat in harmonie saam funksioneer om die maksimum produktiwiteit te verkry met die minste energie inset. Die maklikste manier om permakultuur gilde te verstaan is om na ‘n woud te kyk. Daar is altyd verskillende lae plante. Hierdie lae bestaan uit groot bome, medium bome, struike, rankplante, grondbedekkers en wortelplante – almal vul mekaar op een of ander manier aan. Elke moontlike groeispasie word benut in so ‘n woud en dit is presies wat ons probeer naboots in ons tuin met plante wat groente en vrugte lewer. Ons beweeg weg van onnatuurlike reguit beddings en maak meer gebruik van kurwes en sirkels.

Kom ons kyk na een van die eenvoudigste gilde: Die 3 susters; mielies, rankboontjies en pampoene. Maak ‘n kommetjie in jou tuin, omtrent ‘n meter in deursneë en diep genoeg om water binne te hou. Maak die grond binne in die kommetjie 30cm diep los. Plant ‘n paar mieliesade in die middel. Plant rankboontjies rondom die mielies, aan die binnerant van die kom. Pampoene word geplant aan die buitekant van die kom se rant. Mielies het ekstra voeding nodig om die beste oes te lewer. Die boontjies verskaf ekstra stikstof aan die mielies en pampoene terwyl dit oprank teen die mielies se reguit stele. Die pampoene se groot harige blare bied beskerming teen die son en goggas. Dit is die perfekte gebruik van spasie, energie en water, aangesien jy al drie soorte groente op een slag natmaak deur die kommetjie vol te maak. Daar is etlike voorbeelde van gilde wat jy in jou tuin kan gebruik en dis die moeite werd om meer navorsing te doen oor plantmaats (companion planting).

Tuinwenke:

Hou aan om somergewasse direk te saai asook saailinge te maak vir later uitplant.

Dien gereeld blaarbemesting soos erdwurm tee toe vir gesonde plante en grond.

Gee gereeld water in warm weer, maar maak seker dat blare van pampoene droog bly om roes te verhoed. Wees op die uitkyk vir plantluise wanneer dit warm is en slakke in nat weer.

Wat om te plant:

Saailingbakkies: Artisjokke, Aspersies, Basiliekruid, Beet, Blaarkool, Angeliere, Eiervrug, Soetrussies, Salie, Tamaties.

Saai Direk: Lusern, Amarant, Anys, Asiese groen blare, Aspersies, Basiliekruid, Boontjies, Melissa, Karwy, Wortels, Kattekruid, Seldery, Grasuie, Klaver, Koljander, Koringbloem, Komkommers, Dille, Vinkel, Vlas, Suurlemoenbalsem, Blaarslaai, Kappertjies, Wit Wortels, Warm Rissies, Roosmaryn, Spinasie, Pampoene, Sonneblomme, Soet Mielies, Wurmkruid, Spinasiebeet, Gemmer, Aartappels

Kontak ons gerus vir enige hulp met die uitleg van jou tuin, die samestelling van permakultuur gilde, plantmaats, natuurlike onkruid en pes beheer en soveel meer!

Abingoni Services –

abingoniservices@gmail.com – 072 550 2706