SLANGE EN DIE HORRIES

IMG_4348

Volgens wetenskaplikes is mense, ape en bobbejane geneig om doodbang vir slange te wees. Hulle het bevind sekere breinselle skree “Gevaar!” wanneer primate ’n slang sien. Kry jy omtrent ’n toeval wanneer jy ’n slang sien? Wetenskaplikes het bevind jou reaksie op hierdie sissende, seilende gevaartes is in jou brein vasgelê.

Dit versterk die argument dat slange baie belangrik vir die evolusie van primate is,” sê Lynne Isbell. Sy is die medeskrywer van die verslag en ’n professor in antropologie aan die Universiteit van Kalifornië, Davis. Die verslag in die vaktydskrif Science lewer nuwe bewyse dat primate se sig spesiaal ontwikkel het om slange maklik in woude raak te sien.

Sekere neurone in die brein reageer selektief op beelde van slange en doen dit vinniger as ander neurone wat reageer op beelde van gesigte, hande of geometriese vorms, sê die navorsers. Ander medewerkers aan die verslag is Quan Van Le van die Universiteit van Toyama en navorsers aan die Universiteit van Brasilia. “Slange lok die sterkste, vinnigste reaksies uit,” lui ‘n studie.

Navorsing kan voortaan kyk na die reaksie van primate op ander roofdiere en uitvind hoe die mens se brein reageer.Twee jong makau-ape wat op ’n nasionale aapplaas in Japan gebore is, is vir die navorsing gebruik. Navorsers sê hulle het voor die eksperiment nie gedink die ape sal op die slange reageer nie.

Hulle het mikro-elektrodes ingeplant in ’n deel van die brein wat te doen het met visuele aandag en die vinnige verwerking van dreigende beelde. Toe het die navorsers verskillende beelde in kleur op ’n rekenaarskerm aan die ape gewys. Daar was beelde van slange in verskillende posisies, dreigende aapgesigte, aaphande en eenvoudige vorms soos sterre en vierkante.

Navorsers het bevind 40 persent van die sowat honderd neurone wat reageer het op minstens een van die tipes beelde, het die hewigste reaksie op slange getoon.

In reaksie op die prente van slange het die ape se brein vinnige vreesresponse afgevuur. Hierdie reaksie was baie sterker as by die ander prente.

Navorsing het lankal bewys primate het ’n buitengewone vermoë om slange selfs in digte of deurmekaar en vol omgewings raak te sien. Sig is wat primate van ander soogdiere onderskei. Baie van die strukture in ons brein is aan sig gekoppel.Die jongste inligting verklaar hoekom. Slange is grootliks verantwoordelik vir die ontwikkeling van primate.