Vrae Oor Rugpyn Beantwoord

ortopediese, rugpyn, spiere, hulp1. Is hoë hakke die oorsaak van jou rugpyn?

Dit sal natuurlik nie werk voor te stel dat vroue hulle onpraktiese, maar asemrowende stiletto’s in die asblik moet gooi nie. Gelukkig beteken hoër hakke nie altyd rugmoeilikheid nie.

“Dit is nie dat vroue glad nie hoë hakke moet dra nie. Probeer net om dit nie vir lang tydperke te dra nie. Wissel eerder hoë hakke en plat skoene af. Probeer ook om nie skoene te dra met hakke hoër as 7 cm nie,” sê Cathy Steed, bemarkingsbestuurder van Green Cross.

Gelukkig is daar deesdae verskillende handelsmerke, soos Green Cross, wat pragtige, stylvolle skoene vervaardig wat ook die nodige ondersteuning bied.

“Plathakskoene van goeie gehalte is beter vir jou voete, maar dié met ’n swak struktuur en min ondersteuning kan ook skade berokken,” sê Cathy. ’n Paar oulike plat balletstylskoentjies kan ook soms rugpyn veroorsaak. Die oorsaak is die dun sole, want dit absorbeer nie skok wanneer jy stap nie.

“Die skyfies in jou lae rug is met ’n vloeistof gevul wat ’n tipe kussinkie vorm. Om heeldag te loop met skoene wat nie ondersteuning bied nie, droog hierdie kussinkies soos ’n spons uit,” verduidelik ortopediese chirurg dr. Michael Hisey. As jy dus verkies om plat skoene met dun sole te dra, moet jy ’n spesiale binnesooltjie aanskaf by Dis-Chem of Green Cross vir meer ondersteuning.

Dis ook belangrik om goeie skoene te dra wanneer jy oefen of lang ente gaan stap. Die meeste goeie sportwinkels sal jou help om skoene te kies wat genoegsame ondersteuning en gemak bied.

2. Wees elke dag bewus van jou rug se welstand

Michelle se raad is: “Wees voortdurend bewus van jou postuur en hoe jou daaglikse gewoontes jou rug kan beïnvloed. Klein veranderinkies kan ’n groot verskil maak. Moenie jou handsak of skootrekenaarsak altyd oor dieselfde skouer dra nie.

“Baie mense maak hulle rûe seer deur daaglikse aktiwiteite soos om om te draai en iets op die agterste sitplek van die motor te kry. Of jy tel swaar voorwerpe op.” Moet byvoorbeeld ook nie jou selfoon tussen jou skouer en jou oor vasknyp nie – dit plaas onnodig baie druk op jou ruggraat.

Moenie te lank aaneen sit as jy ’n kantoorwerker is nie. Staan elke 20 minute op. Maak seker jou rekenaarskerm is op ooghoogte. Plaas ’n dik, stewige boek onder die skerm indien nodig en hou jou voete plat op die grond.

3. Maak soos ’n marionet en verbeter jou postuur

Doen die volgende: Sit so regop as wat jy kan, skouers agtertoe en af. Verbeel jou jy is ’n marionet wat met ’n toutjie aan die dak vasgemaak is en boontoe getrek word. Voel dit nie fantasties nie? Dit help om jou rug te versterk en beserings te voorkom.

Die marionet-aan-’n-toutjie-tegniek werk uitstekend en is oorspronklik in die 1970’s deur ortopediese chirurg dr. Guy Beauchamp voorgestel. Hy het ook ’n maklike manier om jouself te daaraan herinner. Kies ’n gewone dagtaak wat jy gereeld doen – soos om e-pos te stuur of op jou horlosie te kyk. Herinner jouself elke keer aan die korrekte postuur as jy hierdie taak verrig. Na ’n paar weke sal jy dit outomaties doen en mooi regop sit en staan.

4. Joga en strek verlig rugpyn ewe goed

’n Eksperiment aan die Universiteit van York het bevind dat mense na ’n jaar steeds voordeel trek uit net 12 weke se joga. Joga help spiere wat moontlik in ’n spasma sou ingaan, om te ontspan.

Alhoewel joga vir laerugpyn help, wil nie almal op hulle koppe staan of in die lotusposisie sit nie. ’n Amerikaanse studie wat in 2011 in die Archives of Internal Medicine gepubliseer is, het bevind dat eenvoudige strekoefeninge net so goed werk. Die ideaal is natuurlik om ’n klas by te woon waar jy gemonitor word, maar jy kan ook tuis strek. Die aanbeveling, na aanleiding van hierdie studie, is dat die voorste en agterste dyspiere, en die buig- en draaispiere van die heupe elk vir minstens ’n minuut gestrek moet word.

5. Akupunktuur sal toekomstige rugprobleme help verminder

Verskeie studies het bewys dat akupunktuur ’n meer effektiewe behandeling vir rugpyn is as medikasie. Kate Winstanley, ’n lid van die Britse Akupunktuurraad, verduidelik hoe ’n paar klein naaldjies ’n groot verskil maak.

“Volgens MRI-skanderings veroorsaak sagte stimulering van spesifieke akupunktuurpunte dat jou liggaam sy eie natuurlike genesingsreaksie aan die gang sit. Dit gebeur wanneer die nodige hormone en natuurlike pynstillers vrygestel word.”

Wanneer jy stres, word die “veg-of-vlug”-proteïen in jou bloed vrygestel. Akupunktuur verlaag hierdie vlak en kalmeer die senuweestelsel. Die naalde aktiveer spesifieke energiepunte wat die regulerende stelsels versterk. Dit beteken jy sal meer energie hê, jou spierfunksie sal verbeter en jy sal minder geneig wees om rugprobleme te kry. Gesels met jou huisdokter of fisioterapeut vir ’n verwysing.

6. Pilates-oefeninge help vir krag en soepelheid

Om jou rug gesond te hou, moet jy beide krag en soepelheid hê, verduidelik Michelle. Sy beveel die volgende twee eenvoudige Pilates-oefeninge aan om jou rug te versterk. Jy kan albei maklik by die huis doen.

* Bekken-oplig tot ’n bekkenkrul
Lê op jou rug met jou knieë gebuig, voete plat op die vloer, knieë vuisbreedte uitmekaar, arms reguit langs jou sye. Maak seker daar is ’n natuurlike kurwe in jou ruggraat. Hou jou buikspiere deurentyd styf. Druk jou rug liggies in die grond in wanneer jy uitasem. Lig nou jou stuitjie van die vloer af op. Hou so aan totdat ook jou heupe van die vloer af gelig is. Asem in sodra jou heupe gelig is. Asem stadig uit terwyl jy jou ruggraat werwel vir werwel laat sak totdat jy weer in die beginposisie is.

* Knielende arm-en-beenstrek
Staan handeviervoet met jou handpalms plat op die vloer. Jou hande moet in lyn wees met jou skouers en jou knieë in lyn met jou heupe. Jou rug moet sy natuurlike kurwe hê. Trek jou naeltjie in na jou ruggraat toe. Hou ook jou kop in lyn met jou rug sodat jou kop nie hang nie. Asem uit terwyl jy jou regterarm vorentoe en jou linkerbeen agtertoe strek en hou vir drie tellings. Herhaal met die linkerarm en regterbeen.

Hierdie oefening vereis ’n sekere mate van skouerstabiliteit. Trek dus jou vlerkies af, weg van jou ore af, en maak seker jou skouers trek nie op tydens die oefening nie.